როგორ იყენებს ფიტნეს ინდუსტრია FIFA მსოფლიო თასს ახალი ბაზრების მოსაპოვებლად

FIFA-ს მსოფლიო თასი დიდი ხანია, აღარ არის მხოლოდ სპორტული ტანსაცმლისა და სასმელების ბრენდების სამეფო. ამჯერად ფიტნესისა და ველნესინდუსტრია სულ უფრო მეტ გზას პოულობს ამ გლობალური ტურნირის გამოსაყენებლად — პროდუქტების პოპულარიზაციისთვის, ცნობადობის გასაზრდელად და საკუთარი ბრენდის მაღალი დონის სპორტულ მიღწევებთან დასაკავშირებლად.

#ოფიციალური პარტნიორები ველნესის კატეგორიას აფართოებენ

როგორც Athletech News წერს, მოედანზე FIFA-სთან მრავალწლიანი თანამშრომლობის წყალობით ყველაზე თვალსაჩინო როლს კვლავ Adidas-ი ინარჩუნებს, თუმცა ახალი პარტნიორები თავიანთ სტრატეგიებს პირადი მოვლისა და მზადების პროცესის გარშემო აგებენ.

Unilever-ი თავისი "House of Fresh" პლატფორმის ფარგლებში 35-ზე მეტ ბრენდს ააქტიურებს. Rexona-ს თავისი პროდუქცია ოფლიანობასთან ბრძოლასა და გამძლეობასთან აკავშირებს, რასაც გასახდელების, სავარჯიშო ჩანთებისა და სტადიონის სარეკლამო სივრცეების მეშვეობით აკეთებს. Axe-მა კი, FIFA-ს იმავე უფლებების გამოყენებით, TikTok-ზე გათამაშება წამოიწყო, სადაც 7 მატჩზე 70-ზე მეტი ბილეთი თამაშდებოდა (მათ შორის — მაიამის მეოთხედფინალის VIP ლოჟის ორი ადგილი).

ამ მომენტს კოსმეტიკური ბრენდებიც იყენებენ. Paula's Choice თავის პროდუქციას პოზიციონირებს, როგორც სპორტსმენის რუტინის ნაწილს — "Starting Lineup Kit"-ის (სასტარტო შემადგენლობის ნაკრების) მეშვეობით. თავის მოვლა სულ უფრო გენდერულად ნეიტრალური მარკეტინგული სტრატეგია ხდება, განსაკუთრებით კანის მოვლის პროდუქტებში, რაც ახალი ტიპის ბრენდებს ტურნირის თავიანთი მიზნებისთვის გამოყენების საშუალებას აძლევს.

#აღდგენის ბრენდები მოთამაშეთა ორგანიზმის აღდგენას უჭერენ მხარს

FIFA-ს ოფიციალური სპონსორების მიღმა, აღდგენის ტექნოლოგიების კომპანიები ეროვნულ გუნდებთან თანამშრომლობითა და ტურნირის სპეციფიკური მოთხოვნებისთვის შექმნილი პროდუქტებით საკუთარ რეპუტაციას იმაღლებენ.

Hyperice აშშ-ის ფეხბურთის ფედერაციასთან თანამშრომლობს, როგორც აღდგენის ტექნოლოგიების პირველი ოფიციალური პარტნიორი. იგი ფედერაციის მამაკაცთა, ქალთა და ახალგაზრდულ ნაკრებებს პერკუსიული, ვიბრაციული, კომპრესიული და თერმული მოწყობილობებით ამარაგებს. კომპანია ცალკეულ მოთამაშეებთანაც პარტნიორობს, მათ შორის, ნიდერლანდების ნაკრების ვარსკვლავ ვირჯილ ვან დაიკთან.

Therabody-მ უფრო ოპორტუნისტული მიდგომა აირჩია CryoTherm Palm-ით — ხელისგულის გამაგრილებელი მოწყობილობით, რომელიც ტურნირამდე გამოუშვა. ის სპორტსმენებს შეჯიბრის დროს სხეულის ტემპერატურის რეგულირებაში ეხმარება. ინგლისის ნაკრებმა ეს მოწყობილობა ვარჯიშებსა და სათადარიგოთა სკამზე ყოფნისას (გვერდითი ხაზის პროტოკოლებში) გამოიყენა.

#ინდივიდუალურ სპორტსმენებთან მუშაობა

Alo ფეხბურთის ცალკეულ მოთამაშეებზეა ორიენტირებული. მისი ახალი კონტენტ-სერია ასახავს ტრევო ჩალობას, ლუკ შოუსა და ალვარო მორატას ძალების აღდგენის რუტინას მოედნის მიღმა, რაც პილატესს, პადელსა და აქტიური დასვენების სხვა ფორმებს მოიცავს.

Stanley 1913, ლიონელ მესის მეშვეობით, უშუალოდ სპორტსმენზე ორიენტირებულ მიდგომას ირჩევს. მისი უახლესი ოქროსფერი "Messi Legacy" კოლექცია მეოთხე კოლაბორაციაა თერმოსების ბრენდსა და ფეხბურთელს შორის. ის ჰიდრატაციასა და გულშემატკივრობას ერთმანეთთან მსოფლიო თასის ოფიციალური ბრენდინგის გარეშე აკავშირებს.

#Whoop და Oura ხილვადობისთვის იბრძვიან

აცვიადი ტექნოლოგიები (Wearable მოწყობილობები) ექსპოზიციის განსხვავებული ტიპით სარგებლობენ: ისინი სპორტსმენების რეალური რუტინის ნაწილად გვევლინებიან.

Whoop-მა მნიშვნელოვანი ყურადღება მას შემდეგ მიიპყრო, რაც ინგლისელ ვარსკვლავს, ჯუდ ბელინგემს გუნდის ვარჯიშზე კომპანიის სამკლაურით გადაუღეს ფოტოები.

მსოფლიო თასზე თავისი პოზიციები გუნდებთან და სპორტსმენებთან პარტნიორობით გაიმყარა Oura-მაც. სმარტ-ბეჭდების მწარმოებელი კომპანია ტურნირის დაწყებამდე აშშ-ის ფეხბურთის ნაკრების ოფიციალური "wearable" პარტნიორი გახდა. გახსნის დღეს კი ინგლისელ ვარსკვლავებთან — ჰარი კეინთან და დეკლან რაისთან გააფორმა ხელშეკრულება, როგორც გლობალურ ამბასადორებთან.

როგორც Athletech News აღნიშნავს, მსოფლიო თასი აჩვენებს, თუ რამდენად გაფართოვდა სპორტის ბიზნესი მოედნის მიღმა. ოფიციალური სპონსორები FIFA-ს უფლებებს მომხმარებელთა უფრო ფართო კატეგორიაში იყენებენ, გულშემატკივრები კი სულ უფრო მეტად ინტერესდებიან იმით, თუ როგორ ვარჯიშობენ, იღდგენენ ძალებს, მოგზაურობენ და უვლიან თავს სპორტსმენები.